Դա - ԱրմԷկո.am

Գլխավոր » Բառարան » Ա Բ Գ Դ Ե Զ Է Ը Թ Ժ Ի Լ Խ Ծ Կ Հ Ձ Ղ Ճ Մ Յ Ն Շ Ո Չ Պ Ջ Ռ Ս Վ Տ Ր Ց Ու Փ Ք և Օ Ֆ

Դեդուկցիա. դատողությունների (մտահանգումների) հիմնական եղանակներից և հետազոտության մեթոդներից մեկը, որի օգնությամբ վարկածի (ենթադրության) ճշմարտացիությունը ստուգվում է նրանից բխող եզրակացությունները իրական տնտեսական փաստերի հետ համեմատելու միջոցով: Դեդուկցիան անցում է ընդհանուրից դեպի մասնավորը, տեսությունից դեպի փաստերը, համադրում է առաջադրված վարկածը փաստերի հետ:

Դեմպինգ. ապրանքների վաճառք այլ երկրներում ինքնաժեքից ցածր գնով:

Դեֆլյավորում. իրական ՀԱԱ-ի հաշվարկում տվյալ տարվա անվանական ՀԱԱ-ի փոքրացման միջոցով, եթե այդ տարում գների մակարդակը ավելի բարձր է եղել, քան բազիսային տարում:

Դեֆլյացիա. երկրի տնտեսության մեջ գների ընդհանուր (միջին) մակարդակի իջեցում:

Դեֆոլտ. փոխառու միջոցների վերադարձման, արժեթղթերի դիմաց տոկոսների վճարման անկարողություն: Դեֆոլտը վերաբերում է ձեռնարկությանը, բանկին և պետությանը, որոնք ի վիճակի չեն կատարել իրենց ֆինանսական պարտավորությունները:

Դիլեր. մասնավոր անձ կամ ֆիրմա, ֆոնդային բորսայի անդամներ, որոնք գործարքներ են կատարում ոչ թե որպես պարզ միջնորդ գործակալներ (բրոկերներ), այլ գործում են, իր անունից և իրենց հաշվին, այսինքն գործի մեջ ներդնում են սեփական միջոցները, իրականացնում արժեթղթերի, տարադրամի և թանկարժեք մետաղների ինքնուրույն առք ու վաճառք:

Դինամիկ տնտեսություն. տնտեսություն, որը միաժամանակ կարող է ավելացնել երկու արդյունքների արտադրությունը: Արտադրական հնարավորությունների կորն այս դեպքում տեղաշարժվում է դեպի աջ, որը հնարավոր է ռեսուրսների քանակական աճի, որակի բարելավման կամ տեխնոլոգիայի կատարելագործման հաշվին:

Դիսկրեցիոն գանձարանային քաղաքականություն. կառավարության կողմից հարկերի (հարկադրույքների) և պետական ծախսերի ծավալի (ապրանքների և ծառայությունների ծախսերի, տրանսֆերտային վճարումների ծրագրերի) կանխամտածված փոփոխությունը՝ նպատակ ունենալով ապահովել ոչ ինֆլյացիոն ՀԱԱ-ի արտադրությունը լրիվ զբաղվածության պայմաններում և խթանել տնտեսական աճը:

Դիվիդենտ. բաժնետիրական ընկերության շահույթի մի մասը, որը նա բաշխում է փայատերերի միջև և վճարում ամեն տարի` նրանց ունեցած բաժնետոմսերի արժեքին համապատասխան: Արտոնյալ բաժնետոմսերի դիվիդենտը հաստատուն մեծություն է, որը ֆիքսվում է նախապես, իսկ սովորական բաժնետոմսերի դեպքում կարող է փոփոխվել` կախված բաժնետիրական ընկերության շահութաբերությունից և ստացված շահույթի օգտագործման ուղղություններից:

Դևալվացիա. տարադրամի օրենսդրորեն սահմանված արժեքի իջեցում:

Անցուդարձ