Մարդու, հատկապես կնոջ օրգանիզմը շատ զգայուն է արևի հանդեպ: Արևի՝ արդեն առաջին ճառագայթների հետ թուլանում են նախկին վախերը, վիրավորանքներն ու ցավերը: Ավելի կայտառ, եռանդուն ենք դառնում, լավատեսորեն նայում կյանքին: Սրանում առեղծվածային ոչինչ չկա: Պարզապես լավ տրամադրության համար պատասխանատու "ուրախության հորմոնը”՝ սերոտոնինը, առավել ակտիվորեն է արտադրվում արեգակի լույսի տակ: Արևը սնուցում է մեզ նաև D վիտամինով, ամրացնում իմունիտետը և լավացնում նյութափոխանակությունը:
Սակայն արևը որքան շռայլ է, նույնքան էլ նենգ կարող է լինել: Դեմքին և վզին գոյացած կնճիռների ուղիղ կեսը արևի "ծնունդն” է: Այս պատճառով, ամռանը տնից դուրս գալիս, առավել ևս լողափ գնալիս, անհրաժեշտ է անպայման օգտվել ուլտրամանուշակագույն Ճառագայթները ֆիլտրող կոսմետիկ միջոցներից: Դրանք մեկուսացնում են այրվածքներ առաջացնող B և մաշկի ծերացման համար պատասխանատու A ճառագայթների մեծ մասը:
Արևային լոգանք ընդունելու ժամանակը խիստ անհատական է: Եթե, ասենք, թուխ մաշկ ունեցողը լողափում պառկելու 1-2 ժամվա ընթացքում ընդամենը կարող է միայն թեթև մգանալ, ապա շիկահերներն այդ ընթացքում "խաշած խեցգետին” կդառնան: Չոր մաշկ ունեցողներին խորհուրդ է տրվում օծվել ձիթայուղով, սա լավագույն քսուքն է արևայրուքի համար: Յուղոտ մաշկին արևային լոգանք ընդունելուց առաջ պետք է քսել քամած տաք թեյի գույն և թողնել մինչև այն չորանա: Չի կարելի արևի տակ դուրս գալ բաղնիքից և դեմքն օճառով լվանալուց հետո, քանզի ճարպային շերտը քայքավում է և մեծանում այրվածքներ ստանալու հավանականությունը:
Որպեսզի արևային լոգանքներն օրգանիզմին օգտակար լինեն, անհրաժեշտ է այն ճիշտ սնել: Այս ընթացքում օրգանիզմը C, B վիտամինների ու բետա-կարոտինի հավելյալ պահանջ ունի: Հետևապես, պետք է ավելի շատ կարմիր մրգեր, հատապտուղներ և բանջարեղեն ուտել: Անհրաժեշտ սպիտակուցներն ու ճարպերը կապահովեն բուսական յուղը, կաթը, և որքան հնարավոր է շատ հեղուկ: Արևը չորացնում է օրգանիզմը, ինչը պատճառ է դառնում վաղաժամ կնճիռների և ընդհանուր թուլության: Սակայն խուսափեք գազով հագեցած զանազան քաղցր ջրերից: Խմեք հանքային ջուր, մրգային ու խոտաբույսերով թեյեր: