Դուք արդեն ուզում եք մի քիչ նիհարել: Ընտրել եք հարմար սննդակարգ կամ պարզապես որոշել եք կրճատել օրվա սննդաբաժինն ու սահմանափակել ուտելիքը: Սակայն արդեն հաջորդ օրն իսկ ձեզ սկսում է տանջել սովածության անտանելի զգացումը, պատճառը, որը շատերին է ստիպում հրաժարվել նիհարելու կամ օրգանիզմը բեռնաթափելու բարի մտադրությունից:

Հնարավոր է արդյո՞ք հաղթահարել այդ դժվարությունը: Այո՛, հնարավոր է:

Սովածության տանջալի զգացումից ազատվել կարող եք հետևյալ կերպ.
• երբ արդեն հուսահատված վրա եք ընկնում սեղանին՝ պատրաստ խժռելու ամեն ինչ, մի՛ շտապեք: Նախ խմեք մի բաժակ հանքային ջուր, ուտելու ցանկությունը կարող է կորչել կամ առնվազն՝ թուլանալ:
• Ուտելիս մի՛ շտապեք, ծամեք դանդաղ: Բանն այն է, որ կշտանալու զգացողությունը միանգամից չի հայտնվում: Եվ մինչև ձեր օրգանիզմը գլխի ընկնի, որ ինքն արդեն կուշտ է, դուք կարող եք ուտելու չափն անցնել:
• Ուտելիքը դրեք փոքր ափսեի մեջ. այն ավելի մեծ կերևա, քան իրականում է: Իսկ երկնագույն ափսեն ի զորու է պակասեցնել քաղցի զգացումը:
• Աղ քիչ օգտագործեք: Աղի ճաշատեսակները ախորժակ են գրգռում:
• Յուղալի և սննդարար բան ուտելու ցանկությունը սովորաբար առաջանում է երեկոյան: Ուստի ավելի լավ է ցերեկը կուշտ ուտել: Դա ձեզ կազատի գիշերը շատ ուտելուց: