Իհարկե, Նոր տարին բոլորի կողմից սիրված և երկար սպասված տոն է: Իսկ գիտե՞ք, թե տարվա ընթացքում քանի Նոր տարի կա և ե՞րբ ու ո՞վ է դրանք տոնում:

Սկսենք նրանցից, ովքեր Նոր տարին տոնում են մեզ նման` դեկտեմբերի 31-ի գիշերը: Այդ երկրներն են Ավստրալիան, Իտալիան, Ճապոնիան, Ռուսաստանը, ԱՄՆ-ը, Ֆինլանդիան և շատ ու շատ այլ երկրներ:

Այնուհետև Նոր տարին տեղափոխվում է Հունաստան, համընկնելով մեր հին Նոր տարվա հետ, այսինքն հունվարի 13-ին: Այդ օրը կոչվում է Սուրբ Վասիլիի օր: Սուրբ Վասիլին հայտնի է իր բարությամբ և հույն երեխաները հունվարի 13-ին իրենց կոշիկները թողնում են բուխարիի մոտ, հույս ունենալով, որ սուրբն այն կլցնի նվերներով:

Հաջորդ Նոր տարին գալիս է լուսնային օրացույցին համապատասխան: Այն չունի ֆիքսված ամսաթիվ, քանի որ նշվում է գարնանային առաջին նորալուսնի ժամանակ: Լուսնային օրացույցին համապատասխան Նոր տարին տոնվում է Չինաստանում, Մալազիայում, Վիետնամում, Սինգապուրում, Կորեայում, Մոնղոլիայում:

Նավրուզ` այսպես է կոչվում Նոր տարվա առաջին օրը, ըստ պարսկական օրացույցի: Այն տոնվում է մարտի 21-ի գիշերը` Աֆղանստանում, Տաջիկստանում և այլ պարսկալեզու երկրներում, ինչպես նաև Միջին Ասիայի հանրապետություններում, Պակիստանում և Ադրբեջանում:

Տեղափոխվենք Հնդկաստան, որտեղ Նոր տարին տոնվում է մարտի 22-ին: Այս երկրում ընդհանուր առմամբ կա 8 ամսաթիվ, որոնք տոնվում են որպես Նոր տարի: Օրինակ, Գուդի Պատվայի օրը, երբ պետք է համտես անել նիմ-նիմ ծառի տերևները (ունեն շատ դառն ու տհաճ համ): Ըստ հին հավատալիքների, դրանք մարդուն պաշտպանում են զանազան հիվանդություններից և դժբախտություններից:

Բիրմայում Նոր տարին սկսվում է ապրիլի 1-ից` ամենատոթակեզ օրերին: Ողջ շաբաթ մարդիկ ջրում են միմյանց, տեղի է ունենում ջրի Ամանորյա փառատոնը` Տինջանը:

Լաոսում Նոր տարին տոնում են ապրիլի 14-ին, երբ շոգից ուժասպառ եղած մարդիկ սպասում են անձրևների:

Սեպտեմբերի 1-ին Սիրիայում սկսվում է ոչ թե ուսումնական տարին, այլ Նոր տարին:

Ինդոնեզիայում Նոր տարին տոնում են հոկտեմբեր ամսին: Այդ օրը մարդիկ զուգվում են և մեկը մյուսից ներողություն են խնդրում անցյալ տարում պատճառած տհաճությունների համար:

Նոյեմբերին Նոր տարին տեղափոխվում է Եմեն, Հավայան կղզիներ և Օվկիանա:

 

Ինչպես տեսնում ենք, ողջ տարվա ընթավքում կարելի է տոնել Նոր տարի, իսկ թե ե՞րբ և ո՞ր Նոր տարին, ընտրեք ինքներդ: Ամենակարևորն այն է, որ դա լինի իսկական տոն: