Օտար երկրում վարքի կարևոր կանոնը, որին անվերապահորեն պետք է հետևել, հասկանալն է, որ դու հյուր ես, դրան համապատասխան տանտերերին հարգելն ու արժանապատվորեն քո հայրենիքը ներկայացնելն է: Ըստ ձեր վարքի, շարժուձևի, արտաքին տեսքի՝ կարծիք կկազմեն մեր երկրի մասին, այդ պատճառով էլ անհրաժեշտ է լինել նրբանկատ և քաղաքավարի: Հիշեցնենք, որ ցանկացած երկրում գնահատվում են տակտը, նախազգուշացվածությունը, սրտառուչ վերաբերմունքը, ժպիտը: Այն, ինչ ձեզ տարօրինակ կթվա, կարող է լինել միանգամայն սովորական այդ երկրի համար: Իսկ այն, ինչ մեր երկրում բոլորի կողմից սովորաբար ընդուված է, կարող է ընդհանրապես անընդունելի համարվել այնտեղ: Չիմանալով տվյալ երկրի ավանդույթներն ու սովորույթները՝ դուք կարող եք անզգուշորեն վիրավորել այդ երկրի ներկայացուցչին կամ ինքներդ կարող եք ընկնել ինչ-որ անհարմար իրավիճակի մեջ: Աշխարհի շատ երկրներում ուշադրությամբ հետևում են որոշ ձևականությունների կատարմանը և հիվանդագին են արձագանքում դրանց խախտմանը: Երբեմն ձեր վարքից կարող է կախված լինել այդ երկրում ձեր հետագա մնալ-չմնալը: Ուստի, արտասահման ուղևորվելուց առաջ ծանոթացեք, թեկուզ ընդհանուր առմամբ, այն երկրի ավանդույթներին, սովորույթներին և բնորոշ առանձնահատկություններին, որը դուք ուզում եք այցելել:

Ֆրանսիացիներին յուրահատուկ է ծայրահեղ ազգայնամոլությունը: Նրանք հիվանդագին են ընդունում գործնական հանդիպումների ժամանակ անգլերենի կամ գերմաներենի օգտագործումը և իրենք էլ տհաճությամբ են սովորում որևէ օտար լեզու:

Ֆրանսիացիները հպարտանում են իրենց ազգային ավանդույթներով: Նրանց գլխավոր արժանիքներից մեկն էլ ֆրանսիական խոհանոցն է, որը համարում են ազգային հպարտություն: Եթե Ֆրանսիայում գտնվելու ժամանակ դուք գովեք որևէ խմիչք կամ խորտիկ, դա կարող է միայն ողջունվել: Ուտելիքը ափսեում թողնելն ընդունված չէ, իսկ եթե դուք ցանկանաք ճաշին աղ ցանել ձեր ճաշակով, իմացեք, որ դա կարող է գնահատվել որպես անհարգալից վերաբերմունք տանտերերի նկատմամբ: Ինչ վերաբերում է սպիրտային խմիչքներին, ապա պետք է նկատի ունենալ, որ լավ գինին համարվում է կերակրի ուղեկից անգամ այն ժամանակ, երբ ֆրանսիացին մենակ է ճաշում:

Ֆրանսիացիները սիրալիր են, խոսքասեր, հաշվենկատ և խնայող: Նրանք շուտ են բռնկվում, նեղանում և երբեք չեն ներում քամահրական վերաբերմունք անգամ մանրուքներում: Ֆրանսիացիների բնորոշ գիծը համարվում է այն, որ չնայած իրենց մարդամոտությանը, նրանք գերադասում են աշխատել միայնակ: Ֆրանսիացիները հաճախ սիրում են վիճել, շատ զգացմունքային են, նրանց խառնվածքը արտահայտվում է ոչ միայն խոսքի, այլև դիմախաղի և շարժումների մեջ: Նրանք սիրում են քննադատել ուրիշներին, բայց միաժամանակ իրենց հասցեին ուղղված քննադատությունը հիվանդագին են ընդունում: Ֆրանսիայում երբեք մի մոռացեք այդ մասին:

Այստեղ, ինչպես ամենուր, գործնական ծանոթության ժամանակ անհրաժեշտ է հանձնել այցեքարտը, բայց քանի որ այստեղ հատուկ ուշադրություն են դարձնում ձեր կրթության մակարդակին, ապա խորհուրդ է տրվում այցեքարտում նշել ձեր ավարտած բուհը, հատկապես եթե այն մեծ հեղինակություն է վայելում:

Ֆրանսիայում շատ կարևոր որոշումներ կայացվում են ճաշի սեղանի շուրջ: Գործնական ընդունելություններ կարող են լինել կոկտեյլի, նախաճաշի կամ ընթրիքի կարգով: Գործերի մասին ընդունված է խոսել սուրճը մատուցելիս: Ֆրանսիացիները քննարկվող հարցին մոտենում են աստիճանաբար՝ տարբեր չեզոք թեմաներով խոսակցությունից հետո, կարծես իմիջիայլոց: Զրուցակցի մեջ բարձր է գնահատվում արվեստի, հատկապես ֆրանսիական իմացությունը: Սակայն պետք է զգուշանալ հավատքի հարցերը շոշափելուց, անձնական հիմնախնդիրների, աշխատանքային դիրքի հետ կապված, եկամուտների և ծախսերի, հիվանդությունների, ընտանեկան դրության, քաղաքական կրքերի մասին խոսելուց: Եթե ձեզ հրավիրել են ընթրիքի, ուրեմն դա բացառիկ պատիվ է: Ընթրիքի պետք է գնալ նշանակված ժամից քառորդ ժամ ուշ՝ ձեզ հետ տանելով ծաղիկներ, մի շիշ շամպայն կամ եթե գինի, ապա թանկարժեք, մի տուփ շոկոլադե կոնֆետներ: Խուսափեք սպիտակ քրիզանթեմներից, դրանք Ֆրանսիայում համարվում են վշտի խորհրդանիշ: