Գեղեցկության հիմնական շարժիչը սեփական գիտակցումն է: Քայլիր հպարտ կեցվածքով և այն տպավորությամբ, թե անգամ քո կրած սովորական զգեստը Փարիզի ամենաթանկարժեք խանութից ես գնել: Մեծ նշանակություն ունի նաև բնավորության առանձնահատկությունները: Պետք է ազատվել բարդույթներից և հասկանալ, որ ժպիտն ու ուրախ տրամադրությունը փոխանցելի է շատերին...

Նայիր շուրջդ: Բոլոր տղամարդիկ չէ, որ ընտրում են սուպերմոդելի դեմքով, 90-60-90 կազմվածքով աղջիկներ: Շատ հաճախ արտաքինով ոչնչով աչքի չընկնող աղջիկը երկրպագուների մեծ բանակ է ունենում: "Ինչո՞ւ",- կհարցնեք դուք: "Նրա հետ ուրախ է, հետաքրքիր և կարելի է ամեն ինչի մասին զրուցել",- կպատասխանի նրա երկրպագուներից մեկը: "Նա միշտ պատրաստակամ է լուծելու ցանկացած պրոբլեմ: Նրանից ինչ-որ ջերմություն է ճառագում",- կպատասխանի մյուսը: Հմայքը ներսից պետք է բխի: Ինքներդ ձեզ վերլուծեք` ինքանո՞վ եք տիրապետում այդ արվեստին: Գուցե ժամանակն է ինչ-որ բան փոխե՞լ...

"Հագուստով դիմավորում են, խելքով ճանապարհում",- ասում է հայտնի ասացվածքը: Հարկը չկա խելքը ցուցադրաբար հրամցնել: Իսկական կինը երբեք տղամարդուն ցույց չի տա իր մտավոր առավելությունները: Ընդհակառակը, նա պետք է թույլ տա, որ տղամարդը զգա, թե ինքն ավելի խելամիտ է, ողջախոհ: Բայց, երբ կինը սրամտում է, ապա հումորի զգացում ունեցող տղամարդուն նա թվում է աշխարհի ամենահետաքրքիր կինը...

Ձեզ հետաքրքիր է շփվել մարդկանց հետ: Ունեք շատ ընկերներ, որոնք ասում են, թե ձեր գնալուց հետո իրենք տխրում են: Մի՞թե սա քիչ է, որ համարվեք գեղեցիկ ու ցանկալի: Ճիշտ է, գուցե ձեր արտաքինը զիջում է ձեր ընկերուհու արտաքինին, բայց բոլորն ասում են, որ ձեզ հետ շփվելով այն տպավորությունն են ունենում, թե 100 տարի ճանաչում են: Սա նշանակում է` դուք հետաքրքիր զրուցակից եք և սպասված հյուր...

Նկատած կլինեք, որ հաջողությունները երբեմն շշմեցուցիչ հոսք են ունենում ձեր կյանքում: Երևի զգացել եք նաև, որ այդ "լուսավոր" օրերին ավելի շատ տղամարդկանց հայացքներ են ձեզ ուղեկցում: Դուք հաճախակի եք ժպտում և դրանով իսկ "վարակում" շատերին: Մի՞թե ժպտերես, երջանիկ, "գարնանային" կինը աննման չէ...

Եթե սիրած տղամարդ ունեք, որը չի հոգնում ամեն օր կրկնել, թե "դու ամենագեղեցիկն ես", հավատա, դա հենց այդպես ել կա: Ամեն առավոտ արթնացեք հենց այդ գիտակցումով: Իսկ ինչո՞ւ պետք է նա խաբի ձեզ: Չէ՞ որ սիրող տղամարդը չի նկատում իր ընտրյալի արտաքին թերությունները: Իսկ եթե սիրելին ձեր կողքին չէ, միևնույն է, հարկ չկա կարծելու, թե դուք տգեղ եք, քանզի սերն ինքնին կնոջը դարձնում է հիասքանչ ու հմայիչ;