ZeroHedge ֆինանսական բլոգի հեղինակները համոզված են, որ եթե աշխարհի հզորներն ավելի վաղ նկատեին 2008թ. համաշխարհային ֆինանսատնտեսական փլուզման ակնհայտ նշանները, ապա միանգամայն հնարավոր կլիներ կանխարգելել ճգնաժամը:
Այն ժամանակ տնտեսագետներին ճգնաժամի մասին զգուշացնող շատ նախանշաններից որոշներն ի հայտ են եկել նաև այսօր: Ֆոնդային, պարտատոմսերի և անշարժ գույքի շուկաներում նկատվող միտումները վկայում են այն մասին, որ պատմությունը կարող է կրկնվել, և քանի որ ֆինանսական համակարգն աշխարհում այսօր անհամեմատ ավելի թույլ է, քան 5 տարի առաջ, դրա հետևանքներն արդեն աղետալի կլինեն:
Որպես ապացույց` բլոգի հեղինակները բերում են տնտեսագետ Մայքլ Սնայդերի դիտարկումները, ով ներկայացնում է վերջին ֆինանսական ճգնաժամի և ԱՄՆ ներկա տնտեսական իրավիճակի 16 նմանություններ:
1. Bank of America Merrill Lynch-ի տվյալներով` իրենց խոշոր ինստիտուցիոնալ հաճախորդները բաժնետոմսերը վաճառում են այնպիսի արագությամբ, ինչպիսին դեռ չի եղել 2008-ից առ այսօր:
2. Բաժնետոմսերի գները 2008-ին խիստ տարբեր էին տնտեսապես հիմնավորված գներից: Այժմ էլ Վաշինգթոնում տիրում է նույն իրավիճակը:
3. 2008-ի սկզբին բենզինի միջին գինը էապես բարձրացավ: Սա սկսում է կրկնվել: Յուրաքանչյուր անգամ, երբ բենզինի միջին գինը ԱՄՆ-ում մեկ գալոնի դիմաց (մոտավորապես 4.55 լ) գերազանցում է 3.8 դոլլարի սահմանը, ֆոնդային շուկան անկում է ապրում:
4. Բնակարանների գները Lehman Brothers-ի սնանկացումից առայսօր արձանագրել են 2 խոշոր անկում և այն էլ` ընդամենը մեկ ամսվա ընթացքում: Նշենք, որ ֆինանսական ծառայություններ մատուցող Lehman Brothers-ը 2008-ի սեպտեմբերի 15-ին հայտարարել էր իր սնանկացման մասին (ԱՄՆ պատմության մեջ խոշորագույնը): Ընկերությունը տնօրինում էր 600 մլրդ ԱՄՆ դոլլարի ակտիվներ:
5. Ֆինանսական վերջին ճգնաժամի ընթացքում երկարաձգված հիփոթեքային վարկերի տոկոսադրույքները կտրուկ աճեցին: Այդ կրկնվում է նաև այսօր:
6. Այսօր, ինչպեսև այն ժամանակ, նկատվում է հիփոթեքային կարգավորվող տոկոսադրույքների ծավալի կտրուկ աճ:
7. Գործազրկության մակարդակը մինչև ֆինանսատնտեսական վերջին ճգնաժամը սկսեց արագ աճել: Գործազրկության նպաստ ստանալու հայտերն այսօր էլ բազմապատկվում են:
8. ԱՄՆ տասնամյա պարտատոմսերի եկամտաբերությունը ներկայում հասել է 2.6%-ի սահմանին: Այն ժամանակ էլ դրանց եկամտաբերությունը մեծացավ հենց 2008թ. առաջին կեսին:
9. Յուրաքանչյուր անգամ, երբ հիմնական կապիտալ ներդրումներում (արտադրական հիմնական միջոցների մատակարարումների ծավալը` բացառությամբ ինքնաթիռների և ռազմական տեխնիկայի) տարեկան փոփոխությունը դառնում է բացասական, Միացյալ Նահանգները, որպես կանոն, արձանագրում է ետընթաց: Այս ցուցանիշն այսօր էլ նվազում է, ընդ որում` շատ արագ:
10. Միջին ժամավարձն ԱՄՆ-ում 2013թ. առաջին եռամսյակում գրանցել է 2009-ից առայսօր նկատված ամենամեծ անկումը:
11. Ընթացիկ տարվա հունիս ամսին ամերիկացիների` ռեստորաններում արված ծախսերը հավասարվել են 2008թ. փետրվարին արձանագրված նվազագույն մակարդակին:
12. Նախքան համաշխարհային ճգնաժամը, ամերիկյան կորպորացիաների եկամուտները խիստ հիասթափեցնող էին, ինչը նկատվում է նաև այսօր:
13. 2008-ին, ինչպես և այսօր, ոսկու գները էապես նվազեցին:
14. Ներկայում գործարար վստահության ինդեքսն ամենացածրն է, ինչը տեղի չի ունեցել վերջին ետընթացից առայսօր:
15. Դեռ 2008-ին ԱՄՆ պետական պարտքը արագ աճեց և հասավ աննախադեպ մակարդակի: Այս առումով` Միացյալ Նահանգներն այսօր ավելի վատթար վիճակում են:
16. Ֆինանսատնտեսական վերջին ճգնաժամի ընթացքում Դաշնային պահուստային համակարգի ղեկավար Բեն Բերնանքեն ամերիկացիներին վստահեցնում էր, թե բնակարանների գները չեն նվազի և տնտեսությունն էլ ետընթաց չի ապրի: Վերջերս նա կրկին անգամ փորձել է համոզել ամերիկացիներին, որ ամեն ինչ հրաշալի է լինելու: Սակայն, դիտարկումների հեղինակը վստահեցնում է, որ այս անգամ էլ չեն իրականանալու Բերնանքեի մարգարեությունները:
Մուտք
5582
| 
ՉԱՏ