ՀՀ կառավարությանն առընթեր պետական եկամուտների կոմիտեն (ՊԵԿ) հրապարակել է 2012 ֆինանսական տարվա հունվար-սեպտեմբեր ամիսների արդյունքներով Հայաստանի խոշոր հարկ վճարողների և նրանց կողմից վճարված հարկերի ու տուրքերի վերաբերյալ ամփոփ տեղեկատվություն:

Համաձայն հրապարակված տվյալների` հաշվետու ինն ամիսների արդյունքներով Հայաստանի խոշոր հարկատուների ցուցակը գլխավորում է «Հայռուսգազարդ» ՓԲԸ-ն: Ընկերությունը հաշվետու ժամանակահատվածում պետական բյուջե է վճարել 22.6 մլրդ ՀՀ դրամ, որից անուղղակի հարկերը (այդ թվում`ԱԱՀ, ակցիզային հարկ) կազմել են 21.2 մլրդ ՀՀ դրամ:

Հայաստանի խոշոր հարկատուների ցուցակի առաջին եռյակում հայտնվել են նաև «Զանգեզուրի պղնձամոլիբդենային կոմբինատ»-ը (Քաջարան) և «Ալեքս Գրիգ» ընկերությունը, որոնք, պետական բյուջե վճարելով համապատասխանաբար 16.4 մլրդ ՀՀ դրամ և 13.5 մլրդ ՀՀ դրամ, զբաղեցնում են Հայաստանի խոշոր հարկ վճարողների վարկանիշի երկրորդ և երրորդ տեղերը:

«Ղ-Տելեկոմ» ընկերությունը (ապրանքային նշանը` Վիվասել-ՄՏՍ), այս տարվա առաջին ինն ամիսներին պետական բյուջե վճարելով 13.3 մլրդ ՀՀ դրամ ընդհանուր ծավալով հարկեր և տուրքեր, հայտնվել է մեր հանրապետության խոշոր հարկատուների ցուցակի չորրորդ հորիզոնականում: Առաջին հնգյակը եզրափակում է մեկ այլ հեռահաղորդակցական ընկերություն` «Արմենիա Տելեֆոն Կոմպանի»-ն («Արմենտել»): Վերջինս պետական բյուջե է վճարել 9.6 մլրդ ՀՀ դրամի հարկեր և տուրքեր:

2012 թվականի հունվար-սեպտեմբեր ամիսների արդյունքներով հարկային պարտավորությունների կատարման շնորհիվ Հայաստանի խոշոր հարկատուների առաջին տասնյակում են հայտնվել նաև «Ֆլեշ»-ը (7.8 մլրդ ՀՀ դրամ), «Սիթի Պետրոլ Գրուպ» ընկերությունը (7.0 մլրդ ՀՀ դրամ), «Հայաստանի էլեկտրական ցանցեր» ընկերությունը, որը հաշվետու ամիսների ընթացքում վճարել է 6.8 մլրդ ՀՀ դրամի հարկեր և տուրքեր, ինչպես նաև «Դինո Գոլդ Մայնինգ Քամփանի»-ն (5.6 մլրդ ՀՀ դրամ):

Հայաստանի խոշոր հարկ վճարողների առաջին տասնյակը եզրափակում է ՀԱԷԿ-ը (4.6 մլրդ ՀՀ դրամ):