Արևելքը արևելք է, արևմուտքը` արևմուտք... չի կարելի ասել, որ արևելքի և արևմուտքի սովորույթների մեջ չկա ընդհանուր ոչինչ, իսկ եթե որոշ դեպքերում նրանք առանձնանում են միմյանցից, ապա դա զարմանալի չէ, պետք է հաշվի առնել այն տասնյակ հազարավոր կիլոմետրերը, որ բաժանում են աշխարհի այս երկու մասերը:

Արևելքում դռներն ու պատուհանները բացված են թողնում, իսկ արևմուտքում` ամուր փակում են:

Չինաստանում ավելի շատ հարգում են տղամարդկանց, քան կանանց, արևմուտքում` հակառակը:

Արևելքում կնոջ դերը կայանում է նրանում, որ հոգ տանի ընտանիքի մյուս անդամների նկատմամբ, արևմուտքում` կինն է ուղորդում ընտանիքի գործունեությունը: Արևելքում կնոջ տեղը տան մեջ է, տղամարդունը` տանից դուրս: Այն, ինչ խոսվում է տան մեջ, երբեք պատերից դուրս չի գալիս: Այն, ինչ խոսվում է դրսում, երբեք չի մտնում տան պատերից ներս:

Չինաստանում հակառակ սեռի ներկայացուցիչները, միմյանց առարկա փոխանցելիս, մատներով չպետք է դիպչեն իրար: Իսկ արևմուտքում տղամարդիկ և կանայք ձեռքով բարևում են միմյանց, հաճախ` ողջույնը ուղեկցվում է համբույրով:

Չինաստանում անշնորհքություն է համարվում ոչ հարազատ մարդու հետ համբուրվելը, մինչդեռ` արևմուտքում դա հարգանքի և քաղաքավարության դրսևորում է:

Արևելքում ընդունված չէ սառը ջուր խմելը, այն համարվում է մի շարք ցավերի հարուցիչ, իսկ արևմուտքում ընդունված է սառը ջրով հագեցնել ծարավը:

Չինաստանում գինին խմելուց առաջ տաքացնում են, արևմուտքում հակառակը` սառեցնում:

Արևելքում կանայք զգեստներ են կրում, որպեսզի պաշտպանվեն քամուց ու ցրտից, ինչպես նաև` քողարկեն մարմինը: Մեծագույն անամոթություն է համարվում, եթե զգեստի տակից երևում է մարմնի որևէ մասը: Իսկ արևմուտքում կանացի զգեստները դիտավորյալ ընդգծում կամ ցուցադրում են մարմնի այս կամ այն բարեմասնությունը:

Արևելքում ջրալի ճաշատեսակներն ուտում են երկրորդ հերթին, իսկ արևմուտքում հակառակը` սկզբից: Արևելքում ճաշելիս չեն խոսում, իսկ արևմուտքում ճաշի սեղանի շուրջ քննարկում են ընտանեկան և գործնական հարցեր:

Չինաստանում սպիտակը սգո գույն է, կարմիրը` հարսանիքի և ուրախության, իսկ սևը` գործնական հանդիպումների և աշխատանքի: Արևմուտքում` հակառակը:

Արևելքում, երբ կանայք զգում են իրենց վրա որևէ մեկի քննախույզ հայացքը, վիրավորվում են, իսկ արևմուտքում կանայք շոյվում են իրենց հանդեպ ցուցաբերվող ուշադրությունից:

Չինաստանում, երբ հյուր են հրավիրում, տանտիրուհին չի դիմավորում նրան, առավել ևս` նրա հետ սեղան չի նստում: Իսկ արևմուտքում կինը ոչ միայն դիմավորում է հյուրին, այլև` թևանցուկ ուղեկցում է նրան, մասնակցում նաև ընդունելության բոլոր արարողություններին:

Չինաստանում պատվավոր հյուրին նստեցնում են տանտիրոջ ձախ կողմում, իսկ Եվրոպայում` աջ, կամ ընդհանրապես չեն կարևորում կողմը: