Եվրամիության 27 երկրների ընդհանուր համախառն ներքին արդյունքի (ՀՆԱ-ի) կեսը և բնակչության կեսից ավելին բաժին են ընկնում Գերմանիային և Ֆրանսիային: Ընդ որում, Գերմանիային բաժին է ընկնում Եվրամիության ՀՆԱ-ի 28%-ը և բնակչության 25%-ը, իսկ Ֆրանսիային` համապատասխանաբար 22%-ը և 18%-ը: Այնպես որ, Գերմանիան և Ֆրանսիան պատահական չեն համարվում Եվրամիության և Եվրոգոտու հենասյուները:

***

Բրիտանացի ծովագնաց նավապետ Ֆրենսիս Դրեյքը 1580 թ. շուրջերկրյա ճանապարհորդությունից հետո իր հետ 600 հազար ֆունտ ստեռլինգ բերեց երկիր այն դեպքում, երբ Անգլիայի թագավորության տարեկան եկամուտն այդ ժամանակ ընդամենը 300 հազար ֆունտ ստեռլինգ էր: Դրեյքի` մեծ հարստություն երկիր բերելուց ոգևորված Անգլիայի Եղիսաբեթ թագուհին անձամբ դիմավորեց նավապետին և նրան ասպետի կոչում շնորհեց հենց նրա "Ոսկե եղնիկ" կոչվող նավի տախտակամածին:

***

Ամերիկացի նավթարդյունաբերող Ջոն Դևիսոն Ռոքֆելլերը` "Ստանդարտ Օյլ" ընկերության հիմնադիրը, 1916 թ. դարձավ աշխարհում առաջին միլիարդատերը:

***

Ամերիկացի հանրահայտ արդյունաբերող Հենրի Ֆորդը 1926 թ. աշխարհում առաջին անգամ իր գործարաններում աշխատանքային օրվա տևողությունը դարձրեց 8 ժամ, շաբաթական 5-օրյա ռեժիմով և սահմանեց այդ ժամանակներում ԱՄՆ-ում ամենաբարձր նվազագույն աշխատավարձը` ժամը 5 դոլար:

***

Առաջին անգամ Եվրոպայից Հնդկաստան հասած պորտուգալացի ծովագնաց Վասկո դա Գամայի արշավախմբի նավերը, 1498 թ., դուրս գալով Հնդկաստանից, բռնեցին տունդարձի ճամփան: Պորտուգալիա հասավ 4 նավերից 2-ը և 170 հոգանոց անձնակազմից 55-ը: Այնուհանդերձ, Վասկո դա Գամայի ճանապարհորդությունը այդ ժամանակ ֆինանսական տեսանկյունից հաջողված էր համարվում, քանի որ Հնդկաստանից բերված ապրանքների վաճառքից ստացված գումարը 60 անգամ գերազանցեց արշավախմբի ծախսերը` կորուստներով հանդերձ:

***

Հարվարդի համալսարանը հիմնադրվել է 1636 թ. ԱՄՆ-ի Մասաչուսեթս նահանգի Քեմբրիջ քաղաքում: Հարվարդի համալսարանի հեղինակության և բարձր վարկանիշի մասին է վկայում նաև այն, որ այդ համալսարանն են ավարտել ԱՄՆ-ի 8 նախագահները, 75 Նոբելյան մրցանակակիրներ եղել են համալսարանի սաներ, աշխատակիցներ և դասախոսներ: Հարվարդի համալսարանը երկրում առաջին տեղն է գրավում իր միլիարդատեր շրջանավարտների քանակով: Պակաս հետաքրքիր չէ նաև այն, որ Հարվարդի համալսարանական հիմնադրամը կազմում է 32 մլրդ դոլար: