Ամեն ինչ սկսվեց 1857 թվականի գարնան սկզբին, երբ Նյու Յորքի տեքստիլագործ կանայք պահանջեցին աշխատավարձերի բարձրացում, աշխատանքային միջավայրի բարելավում և կանանց հավասար իրավունքներ: Ցույցն իհարկե ցրեցին, բայց կապված իր անսովորության հետ, այն բավական աղմուկ բարձրացրեց: Այս իրադարձությունը նույնիսկ սկսեցին անվանել Կանանց օր… 

Անցավ ավելի քան 50 տարի, և 1908 թվականի փետրվարի վերջին կիրակի օրը հազարավոր կանայք կրկին դուրս եկան Նյու Յորքի փողոցներ: Այս ցույցը նույնպես, ինչպես արդեն կարելի էր հասկանալ, հետապնդում էր 1857 թվ. "Կանանց օրվա” նպատակները: Կանայք կրկին սկսեցին պահանջել ընտրական ձայնի իրավունք, դուրս եկան աշխատանքային բարդ պայմանների դեմ: 

1909թվ. Կանանց օրը կրկին նշվեց ցույցերով և գործադուլերով: 1910 թվ. սոցիալիստ և ֆեմինիստ կանայք այդ օրը նշեցին ամբողջ երկրով: Ավելի ուշ այդ նույն տարում "դեպուտատներն" ԱՄՆ-ից մեկնեցին Կոպենհագեն սոցիալիստ կանանց Երկրորդ Միջազգային Կոնֆերենցիային մասնակցելու համար, որտեղ և հանդիպեցին Կլարա Ցետկինին: Վերջինս, ոգևորվելով իր "ամերիկացի սոցիալիստ քույրերի” գործողություններով, առաջարկեց կոնֆերենցիային քննարկման դնել այն հարցը, որ ամբողջ աշխարհի կանայք ընտրեն հատուկ օր, երբ նրենք կգրավեն հասարակության ուշադրությունը իրենց պահանջմունքների նկատմամբ: Կոնֆերենցիային մասնակցում էին ավելի քան 100 կանայք 17 երկրներից, որոնք միաձայն կերպով պաշտպանեցին այդ առաջարկությունը:

Առաջին անգամ Կանանց Միջազգային օրը անցկացվեց 1911 թվ. մարտի 19-ին Գերմանիայում, Ավստրիայում, Դանիայում և մի շարք այլ եվրոպական երկրներում: 1912 թվ. կանայք այդ օրը նշեցին ոչ թե մարտի 19-ին, այլ մարտի 12-ին, և միայն 1914թվ. սկսած այդ օրը սկսեցին նշել մարտի 8-ին: