Լինում են նաև դեպքեր, երբ մարդը, նախօրոք իմանալով իրեն սպասվող «վատ» երևույթի մասին, սկսում է նախօրոք տառապել, իր խնդիրների մասին կիսվել նույնիսկ անծանոթների հետ, միայն թե հուսադրող բան լսի: Օրինակ, լավ վաստակող ամուսինը կնոջն առաջարկում է հրաժարվել ցածր վարձատրվող աշխատանքից` հանուն ընտանիքի: Իսկ կինը սկսում է մտածել այն մասին, որ շուտով իր աշխատանքային ընկերները կմոռանան իրեն, ինչպես ժամանակին իրեն մոռացել են համադասարանցիներն ու համակուրսեցիները... Բայց մի՞թե չկա մեկը, ով հիշեցնի նրան այն երկարաժամյա աշխատանքի մասին, որից հետո նա տուն էր գալիս, երբ չուներ ազատ րոպե շփվելու իր երեխաների հետ: Քանի՞ անգամ է նա մտել տուն, իսկ երեխաները քնած են եղել: Հիմա նա կարող է մոտ լինել իր երեխաներին և սիրված` ամուսնու կողմից: Իսկ որպեսզի ընկերները չմոռանան իրեն, կարող է ուղղակի ավելի հաճախ այցելել նրանց, կազմակերպել երեկույթներ, հրավիրել նրանց իր տուն:

Պե՞տք է արդյոք ազատվել խղճահարությունից

Խղճահարությունը, ինչպես և մնացած զգացմունքները, անհրաժեշտ է մարդուն: Բայց ի տարբերություն մնացած զգացմունքների, երբ խղճահարությունն է գլուխ բարձրացնում, մնացած զգացմունքները մթագնում /անհետանում/ են: Մարդն այլևս ունակ չի լինում ո՜չ ժպտալ, ո՜չ տեսնել արևի լույսը, ո՜չ ապրել... Եվ այս մթության մեջ նրա ցանկությունը միակն է` անվերջ տխրել, մտածելով, որ իր կյանքն անիմաստ է, աշխարհում իր համար տեղ չկա: Եվ ինչքան շատ է մտածում այդ մասին, այնքան ավելի է համոզվում դրանում:

Ինչպե՞ս ազատվել նման տեսակ «խորը խղճահարությունից»

Գոյություն ունի մի հետաքրքիր մեթոդ, որը թույլ է տալիս հաղթահարել այս հոգեվիճակը: Այն զվարճալի է և միևնույն ժամանակ շատ արդյունավետ:  Հիմնական շեշտը դրվում է մարդու հավատի վրա. իբր նա լցրեց խղճահարության կաթսան, թափեց այն և վրան լցրեց մաքուր ջուր, որը հոսաց ու մաքրեց` չթողնելով ոչ մի կաթիլ խղճահարություն…

Զարմանալի է, բայց այս մեթոդը (մեդիտացիա) օգնել է շատերին: Այն նույնիսկ խորհուրդ է տրվում կատարել այն մարդկանց, ովքեր գրեթե չեն հայտնվում նման իրավիճակներում (չունեն ինքնախղճահարության սինդրոմներ):

Ինքնախղճահարությունը լավ երևույթ է, եթե չափի մեջ լինի: Օրինակ, եթե օգտագործենք այն մեր կյանքը դեպի լավը փոխելու նպատակով: Ասենք, դուք տեսել եք մի բան, որը կարող էր ավելի լավ լիներ, եթե ձեր կողմից մի քիչ ջանք թափվեր: Եվ Դուք իսկույն հանձն եք առնում այդ գործը: Արդյունքում ձեր կյանքը կերպարանափոխվեց, իսկ դուք արդեն ուրիշ մարդ եք`  ուժեղ ու հաստատակամ… Քանի որ արեցիք այն, ինչ կարող էիք անել, այլ ոչ թե բողոքեցիք ու սկսեցիք խղճալ ինքներդ ձեզ:

Խղճահարությունը կբարդացնի, ոչ միայն ձեր կյանքը, այլև ձեր սիրելիների ու ընկերների:

Մի՛ խղճացեք ինքներդ ձեզ, ապրե՛ք, ստեղծե՛ք, կանգ մի՛ առեք երբեք, կյանքի ամեն րոպեն թանկ է և անվերադարձ: Մի՛ վատնեք այն խղճալով ինքներդ ձեզ, փակվելով ձեր ներսում: Բացվե՛ք, ժպտացե՛ք կյանքին: Ինչպես արևն է լույս տալիս, ջերմացնում, այնպես էլ դուք լույս սփռեք և ջերմություն տվեք ձեր սիրելիներին...