Վաղուց անցել են այն ժամանակները, երբ ակնոց կրում էին կամ տեսողությունը կարգավորելու կամ արևից պաշտպանվելու համար: Այսօր ակնոցը հագուկապի անհրաժեշտ լրացումներից մեկն է: Ակնոցը կարող է խորհրդավորություն տալ ձեր տեսքին, ապահովել գիտությամբ զբաղվողի վարկը: Իսկ եթե այնքան հանրահայտ եք, որ ուզւմ եք թաքնվել երկրպագուների հետևող հայացքներից, ակնոցը կարող է լավագույն օգնականը լինել:

Բոլոր դեպքերում ակնոցի ընտրության հարցում չպետք է հետ մնալ նորաձևությունից: Շարունակում են նորաձև մնալ դասական ակնոցները: Աշխարհահռչակ ֆիրմաների առաջարկած տեսականիում հաճախ տեղ ունեն թանկարժեք մետաղները: Ինչ խոսք, գներն այնքան էլ մատչելի չեն, սակայն կա արդարացում. դասական ակնոցը կարելի է կրել մի քանի տարի: Ամենօրյա գործածության համար խորհուրդ է տրվում գործածել փոքր-ինչ ձգված, հաստ շրջանակով ակնոցներ: Բարձրաստիճան տիկնայք առավել հաճույքով են կրում կրիայի պատյանից պատրաստված շրջանակով ակնոցներ: Իսկ երիտասարդությունը նախապատվությունը տալիս է թեթեև, բազմագույն ակնոցներին, որտեղ ապակուն փոխարինում է պլաստմասսան: Նրանք, ովքեր սիրում են իրենց տեսքով ցնցել ներկաներին, կարող են ընտրել արտառոց ձևեր ունեցող շրջանակներ:

Հետզհետե վերանում է կանանց և տղամարդկանց ակնոցների խիստ տարբերակումը: Սակայն ինչ ակնոց էլ կրեք, մի մոռացեք, որ դրանց առաջնային կոչումը արևի ճառագայթներից պաշտպանելն է: Շոու բիզնեսով զբաղվողներն ու հանրահայտ աստղերը գրեթե միշտ նախապատվությունը տալիս են սև ապակիներին: Դրանք, ինչ խոսք, իրենց պաշտպանիչ հատկությամբ գերադասելի են վարդագույններից, բայց զիջում են կանաչավուն, ծխագույն և շագանակագույն երանգներով ապակիներին (վերջիններս գրեթե անթափանց են ուլտրամանուշակագույն ճառագայթների համար):