Բարձր լեռներում աճում էր մի ծառ, որն իրականացնում էր ցանկությունները: Շատ մարդիկ են փորձել գտնել այդ ծառը և իր ցանկությունը պահել: Նա, ով գտնում էր հրաշք ծառը, իրոք գտնում էր այն ամենը, ինչ խնդրում էր: Սակայն մարդկանց մեծ մասին չէր հաջողվում հասնել ծառին. խոր կիրճերը, ձորերը մարդկանց չէին թողնում անգամ մոտենալ նրան: Մի անգամ ճանապարհորդը մոլորվում է լեռներում և մշուշի մեջ միանգամայն անսպասելիորեն բախվում է այդ ծառին: Այն, որ գոյություն ունի մի ծառ, որն իրականացնում է բոլոր ցանկությունները, նա ոչինչ չգիտեր: Ուժասպառ` նա ընկնում է նրա արմատների մոտ ու մտածում է, որ շատ է ուզում քնել: Եվ, իհարկե, միանգամից քուն է մտնում: Արթնանում է հանգստացած և մտածում, որ շատ է ուզում խմել, ու իսկույն ոտքերի տակից աղբյուր է բխում: Սառը ջուրը խմելով` ճանապարհորդը մտածում է, որ վատ չէր լինի նաև ուտել. իսկույն նրա առջև ուտելիք է հայտնվում: Երբ նա հագեցնում է քաղցը, հանկարծ մտածում է, որ այս ամենը շատ տարօրինակ է և այստեղ, հավանաբար, սատանայի մատն է խառը. սատանան իսկույն հայտնվում է նրա առաջ: Սարսափահար նա մտածում է, որ հիմա իրեն կտոր-կտոր կանի, և սատանան նրան կտոր-կտոր է անում:

Մենք բոլորս գրեթե շատ նման ենք այս ճանապարհորդին: Բանն այն է, որ մեր ցանկությունները շարունակ իրականանում են, միայն թե մենք այդ մասին չգիտենք և բնավ չենք մտածում: Կարելի է ասել, որ մենք նստած ենք ցանկությունների ծառի տակ, սակայն անգամ չենք կասկածում այդ մասին:

Հոգեբանները կարծում են, որ այսպես կոչված դրական մտածողությունը կյանքում մեզ անչափ օգնում է: Նա, ով սովորել է չմտածել վատի մասին ու շարունակ մտածում է ինչ-որ լավ, ուրախ, կենսահաստատ բանի մասին, շատ բան է ստանում: Եթե, օրինակ, այդ մարդը հիվանդանում է, սկսում է արագ ապաքինվել, իսկ եթե նրա համար կարևոր է հաջողությունը, ապա գործերում հաջողության է հասնում: Դրական մտածողության ուժը շատ տպավորիչ է...

Ուրախ և տխուր մտքերի միջև ընտրությունը ձերն է... մտածեք միայն դրական, միայն լավ բաների մասին... և ձեր կյանքը կսկսի աստիճանաբար, սակայն անշեղորեն լավանալ: