Քեննետ Էրրոու (ԱՄՆ)
1972թ. - "Հավասարակշռության ընդհանուր տեսության մեջ նորարական ներդրման համար":
Քեննետ Էրրոու (ծն. 1921, ԱՄՆ). տնտեսագիտական կրթությունը ստացել է Կոլումբիայի համալսարանում: 1951-ին "Սոցիալական ընտրությունը և անհատական արժեքները" ուսումնասիրության համար ստացել է դոկտորի աստիճան: Դասախոսել է Չիկագոյի, Ստենֆորդի, Հարվարդի համալսարաններում: 1950-ական թվականները Էրրոուի համար արգասաբեր էին տնտեսագիտական տեսության մեջ էական ներդրումներով, հատկապես կապված մրցակցային շուկայում հավասարակշռության պայմանների հետազոտության ուղղությամբ: Նա ցույց է տվել, որ շուկայական համակարգի օպտիմալ գործողության համար կառավարությունը չպետք է ուղղակի (օրինակ՝ գների վերահսկման միջոցով) միջամտի եկամուտների վերաբաշխմանը: Շուկայական ուժերի ազատ գործողության համար ավելի արդյունավետ է դիտվում տնտեսական լծակների (հարկերի, տրանսֆերտների) օգտագործումը: Որոշակի են նրա ներդրումները օպտիմալ պաշարների տեսության, շուկայական մոդելների կայունության, մաթեմատիկական ծրագրավորման, վիճակագրական որոշումների տեսության, տնտեսական աճի և բաշխման հիմնահարցերի վերլուծության ուղղությամբ:
Աշխատությունները. "Սոցիալական ընտրությունը և անհատական արժեքները" (1951), "Դասական տնտեսության բարեկեցության բազային տեսությունների ընդլայնումը" (1954), "Կապիտալի փոխարինումը աշխատանքով և տնտեսական արդյունավետությունը" (1961), "Պետական ինվեստիցիաները, շահույթի նորման և օպտիմալ հարկային քաղաքականությունը" (Մ. Կուրցի հետ համատեղ-1970):
Մուտք
ՉԱՏ