Եվրասիական զարգացման բանկի վերլուծաբանները եկել են այն կարծիքին, որ Հայաստանի արդյունաբերության ու արտահանման աճի բարձր տեմպերը 2013 թվականի առաջին կիսամյակում պահպանելու դեպքում, հնարավոր կլինի խոսել երկրի տնտեսության կառուցվածքային բարելավվման մասին: Վերլուծական վարչության հրապարակած հերթական ''ԱՊՀ-ի մակրոմոնիտորում'' նշում են, որ 2012 թվականին Հայաստանի տնտեսությունն աճել է 7.2 տոկոսով: Արդյունաբերության աճը կազմել է 8.8%, գյուղատնտեսությանը` 9.5%, առևտրինը` 3.6%, իսկ ծառայությունների աճը` 10.8%: Բարձր տնտեսական աճը պայմանավորվել է ներքին սպառողական պահանջարկի վերականգնմամբ, մետաղի արտահանման պահանջարկով և գյուղատնտեսության համար բարենպաստ եղանակային պայմաններով:
Զեկույցում նշվում է, որ 2012թ. արդյունքներով` ԱՊՀ տարծաշրջանում տնտեսական զարգացման հիմնական առանձնահատկությունը եղել է ներդրողական պահանջարկի թուլացումն ու արտահանման ուղղվածությամբ արդյունաբերական ոլորտներում արտադրության դանդաղեցումը: Ընդ որում, ԱՊՀ-ի բոլոր տնտեսություններում աճի շարժիչը եղել է սպառողական պահանջարկը:
Այդ երկրների ՀՆԱ-ների ցուցանիշների վրա անդրադարձել է 2012թ. նավթի գների աճի կտրուկ դանդաղումը: Արդյունքում ԱՊՀ երկրների ընդհանուր ՀՆԱ-ն 2012թ. աճել է 3.4%, որը զգալի պակաս է 2011թ. 4.7%-ից: Ընդ որում, Արբեջանում, Հայաստանում և Տաջիկստանում նկատվել է աճի տեմպերի արագացում, իսկ տարածաշրջանի ավելի խոշոր տնտեսություններում` տնտեսական դինամիկայի զգալի թուլացում: