Cher - Woman's World

Աշխարհահռչակ երգչուհի Շերը ներկայացրել է «Woman's World» երգի հիման վրա նկարահանված հոլովակը: Այն 12-ամյա դադարից հետո երգչուհու առաջին տեսահոլովակն է: «The Daily Mail»-ի փոխանցմամբ, պարային հոլովակում, որն անկասկած դառնալու է ակումբների հիթը, Շերը ներկայանում է տարբեր գույների եւ ձեւերի կեղծամներով: Նշենք, որ երգչուհու նոր ալբոմը թողարկվելու է հոկտեմբերի 14-ին: Ինչպես ավելի վաղ տեղեկացրել էր «The Huffington Post»-ը, երգը նվիրված է կանանց: Այս մասին իր «Twitter»-ում պատմել էր Շերն ինքը. «Երբ ես սկսեցի կատարել այս երգը, մտածում էի ուժեղ կնոջ մասին: Քիչ ավելի ուշ ես որոշեցի, որ նա կոչվելու է «Woman’s World»: Մենք հզոր ենք: Դե, տղամարդիկ նույնպես, իհարկե»: Ի դեպ, Շերի վերջին սկավառակը թողարկվել էր 2001 թվականին: Շերը երաժշտական արտադրության պատմության մեջ ամենաշատ ձայնագրություն վաճառած կատարողներից է: Նրա «Believe» սինգլը 1999 թվականին ամենաշատ վաճառվածներից է: Ամբողջ աշխարհում վաճառվել է այդ կոմպոզիցիայի ավելի քան 10 մլն օրինակ: