«Բարև փոս» ակցիա Գյումրիում

Այսօր Գյումրու մի խումբ երիտասարդներ Գյումրու քաղաքապետարանի դիմաց կազմակերպել էին «Բարև, փոս» անվանումը կրող ակցիան, որի ընթացքում երիտասարդները՝ ձեռքերին պահած «Փողոցը լավ չեք ասֆալտում, որ ի՞նչ անեք», «Ջեբդ մի լից, փոսը լից» և այլ բովանդակությամբ ցուցապաստառները, կանգնել էին ճանապարհին՝ ի նշան բողոքի քաղաքի փողոցներում տիրող իրավիճակի համար: Ներկաները նշեցին, որ քաղաքի փողոցները ունեն արմատական վերանորոգման կարիք, և մասամբ իրականացվող փոսային նորոգումները անարդյունավետ են, քանի որ շատ արագ քանդվում են: Վարորդների մի մասը ողջունեց երիտասարդների նախաձեռնությունը՝ միանալով նրանց, իսկ մի մասը, խախտելով սահմանված արագությունը և անվտանգության կարգը, վրաերթի վտանգ ստեղծելով՝ անցավ ակցիայի մասնակիցների արանքով: Նշենք, որ Ճանապարհային ոստիկանները որևէ կերպ չարձագանքեցին վարորդների անվայելուչ պահվածքին և թույլ տված խախտումներին: