9 խորհուրդ առաջին աշխատանքային օրվա համար

Առաջին աշխատանքային օրը անշուշտ ծանր փորձություն է: Բոլորը մտովի քեզ գնահատում, համեմատում ու քննարկում են: Այդ օրը հաջող կերպով ավարտին մոտեցնելու համար հետևիր մեր առաջարկած պարզ ու արդյունավետ խորհուրդներին:

1. Հետախուզիր
Փորձիր հնարավորինս շատ տեղեկություն հայթայթել նոր աշխատավայրիդ վերաբերյալ նախքան այդ կարևոր օրը: Վստահ ենք՝ պարոն Գուգլը քեզ կօգնի:

2. Ճիշտ հագնվիր
Այդ օրը հարկավոր է ազդեցիկ ու հարիր տեսք ունենալ: Կրիր այնպիսի հագուստ և հատկապես կոշիկներ, որոնցում դու քեզ առավելագույնս անկաշկանդ կզգաս: Այդ օրը դու այնքան անհանգստանալու առիթ կունենաս, որ ավելորդ գլխացավանք քեզ անհրաժեշտ չէ: Խուսափիր ծայրահեղություններից. ոչ անհարմար բարձրակրունկ կոշիկներ և ոչ էլ սպորտային կեդեր:

3. Կարգի բեր կապի միջոցներդ
Մի վիրավորվիր, եթե առաջին օրը հայտնաբերես, որ քեզ համար նախօրոք աշխատանքային անկյուն չեն պատրաստել: Ուղղակի արագ ամեն ինչ կարգի բեր, ծանոթացիր համակարգչիդ ու ներբեռնիր քո նախընտրած կարևոր ծրագրերը:

4. Կահավորիր քո տարածքը
Հիշիր, որ աշխատանքային տարածքը քեզ չի պատկանում: Իհարկե դու կարող ես ինչ-որ փոքր անձնական իրեր պահել քո սեղանի վրա, բայց զգույշ եղիր, որպեսզի չչարաշահես այդ ամենը:

5. Լսիր
Ուղղակի հետևիր, թե ով ինչ է անում, ու շուտով կդառնաս այդ ամենի ակտիվ մասնակիցը: Ծանոթացիր գրասենյակում իշխող գրված ու չգրված օրենքներին:

6. Հիշիր նրանց անունները
Սա շատ կարևոր նախապայման է. որքան արագ սերտես գործընկերներիդ անունները, այնքան արագ կընտելանաս նոր միջավայրին: Եթե հարկ կա, թաքուն գրի առ նրանց անունները:

7. Դադարներ տուր
Առաջին օրերը շատ լարված են ու ուժասպառության կարող են հանգեցնել: Ամեն գնով աշխատիր գոնե 2 ժամը մեկ սրճադարար ունենալ:

8. Քեզ ազատ զգա
Բոլորն էլ գիտեն, որ սա քո առաջին աշխատանքային օրն է: Քեզ ազատ զգա ու հարցեր տուր, այդպես դու կկարողանաս նաև կարճ զրույցներ ունենալ գործընկերներիդ հետ:

9. Ինքնավստահ եղիր
Հիշիր՝ դու նրանց այնքան ես դուր եկել, որ նրանք հենց քեզ են ընտրել. այս միտքը հաստատ կբարձրացնի քո ինքնավստահությունը:

Դե ինչ՝ քեզ հաջող առաջին աշխատանքային օր...