ԱրմԷկո.am

Սեղանի ձևավորում

armeco-87 — Wed, 18 Mar 2026 15:16:53 GMT

Սեղանին գցեք ճերմակ, լավ արդուկած սփռոցը, որի միջնածալքը պիտի անցնի սեղանի ճիշտ կենտրոնով: Խորհուրդ ենք տալիս սփռոցի տակ փռել մահուդ կամ ծանր ու փափուկ որևէ այլ կտոր. սփռոցը հարթ կփռվի, և կմեղմանա ափսեների ու դանակ-պատառաքաղի թխկոցը:

Սեղանակիցների թվից ելնելով` բարակ կտրտած սև ու սպիտակ հացով երկու երեք ափսե դրեք սեղանին` յուրաքանչյուրի սպասքին հնարավորին չափ մոտ:

Գինին (շամպայնից բացի) պետք է դնել բերանները բացած շշերով` նախապես խնամքով մաքրելով բերանները: Օղին և թուրմերը ցանկալի է մատուցել գրաֆիններում: Շամպայնը բացում են գավաթները լցնելուց անմիջապես առաջ:

Նախուտեստները դրեք սեղանի տարբեր մասերում: Պղպեղի, քացախի, սոուսների, մանանեխի, աղի ամանների քանակը կախված է ճաշողների թվից:

Խորհուրդ ենք տալիս սեղանին միևնույն ձևի և գույնի սպասք դնել: Ընտանիքի յուրաքանչյուր անդամի և հյուրի համար դրեք մեկական փոքր սեղանի ափսե, դրա մեջ` նախուտեստային, իսկ կողքին` կարկանդակների համար նախատեսված ափսեն:

Փոքր ափսեի աջ կողքին դրեք գդալ և դանակ (վերջինիս սուր շեղբը` ափսեի կողմը), իսկ ձախից` պատառաքաղը: Գդալներն ու պատառաքաղները պիտի դրվեն ուռուցիկ կողմը դեպի դուրս:

Անձեռոցիկները, ծալելով եռանկյունաձև կամ բրգաձև, դրեք նախուտեստային ափսեի վրա:

Ընտանեկան ճաշի դեպքում սովորաբար գինիների բազմազանություն չի լինում, դրա համար էլ անհրաժեշտություն չկա սեղանին ավելորդ ըմպանակներ ու բաժակներ դնելու: Եթե ձեր սեղանը տոնական է, յուրաքանչյուր սպասքի մոտ դրեք մեկ ըմպանակ օղու, մեկն էլ` գինու համար, մեկական գավաթ կամ բարձր բաժակ էլ` մրգահյութի կամ լոլիկի հյութի համար:

Ճաշասեղանի կողքին, տանտիրուհու աթոռի մոտ, կարելի է դնել սեղանիկ` վրան ապուրամանը, մաքուր ափսեներ ապուրի համար և այլն:

Եթե սեղանի շուրջ նստած են 5–6 հոգի, տանտերը կամ տանտիրուհին կարող են հյուրին փոխանցել տապակածի կամ ձկան ափսեն, իսկ ճաշողների մեծ թվի դեպքում ավելի հարմար է ափսեները բաժանել` շրջանցելով սեղանը: Այդ դեպքում հարկավոր է նկատի ունենալ հետևյալ կանոնը. երբ բաժանում եք արդեն կերակուրով լցված ափսեն, այն հյուրին մատուցեք աջ կողմից, իսկ եթե ուտեստը տրվում է ընդհանուր ամանով, և հյուրն ինքը պիտի վերցնի, ապա նրան մոտեցեք ձախ կողմից:

Ընթիքի սեղան բացելիս, որը հիմնականում կազմված է սառը ճաշատեսակներից, կերակուրները կարելի է անմիջապես դնել սեղանին, եթե, իհարկե, սեղանի չափերն այդ թույլ են տալիս:

Սեղանի կենտրոնում դրեք տապակածի ափսեն, դրանից աջ և ձախ` ձկան և մյուս նախուտեստների ափսեները: Ափսեների միջև դրեք գինու շշերը և լոլիկի ու մրգահյութի սափորները: Սոուսամանները դրեք մի քանի տեղ` կախված սեղանի չափերից և ընթրողների թվից:

Սեղանին դրեք միայն դանակ և պատառաքաղ, քանի որ ընթրիքին սովորաբար ապուր չի մատուցվում: Եթե նախատեսել եք արգանակ, ապա մատուցեք արգանակի գավաթներում, ափսեին դնելով աղանդերային գդալ:

Ձևավորված սեղանը կարելի է զարդարել թարմ ծաղիկներով, դրանք (ոչ բարձր ծաղկամանների մեջ) դնում են սեղանի կենտրոնում կամ երկու - երեք տեղ` սփռոցի միջնածալքի երկարությամբ:

Ճաշի սեղանի ամանեղենի և սպասքի հավաքածու վեց հոգու համար.
6 Խոր ափսեներ
6 Երես ափսեներ
6 Նախուտեստային ափսեներ
6 Կարկանդակի ափսեներ
2 Աղցանի ամաններ
1 Ապուրի թաս
1 Սոուսաման
1 Կլոր սկուտեղ
1 Ձվաձև սկուտեղ
1 Հացաման
6 Արգանակի գավաթներ` տակդիրներով
1 Պղպեղի, մանանեխի և քացախի աման
1 Ջրի գրաֆին
1 Մրգահյութի գրաֆին
1 Օղու գրաֆին
6 Օղու ըմպանակներ
6 Գինու ըմպանկներ
6 Գավաթներ
6 Գավաթներ շամպայնի համար
6-ական Դանակներ, ճաշի և աղանդերային պատառաքաղներ

Պիցցաներ

armeco-87 — Tue, 17 Sep 2013 09:24:17 GMT

ՊԻՑՑԱ ԱՄԵՐԻԿՅԱՆ

Բաղադրությունը
Խմորի համար ալյուր, 0,5 լ ջուր, 50 գ դրոժ, 1 ձու, 1 թեյի գդալ աղ:
Լցոնի համար 300 գ երշիկ, 100 գ տոմատի մածուկ, 2-3 գլուխ սոխ, 100-150 գ պանիր, 50 գ գազար, 50 գ մարինացված պղպեղ, մի քանի շերտ սալյամի:

Պատրաստման եղանակը
0,5 լ տաք ջրում լուծել դրոժը, ձուն ջարդել և աղ ցանելով՝ խառնել: Ալյուր ցանել այնպես, որ խմորը նման լինի թանձր թթվասերի: Խմորը 1-2 ժամ դնել սառնարանը: Տապակային արևածաղկի ձեթ քսել, լցնել խմորը և սպասել, որ խմորը տարածվի ամբողջ տապակայով: 5-7 րոպե դնել ջեռոցը: Երբ խմորը մի փոքր վարդագույն դառնա, հանել ջեռոցից և անմիջապես լցնել լցոնը. խմորի ամբողջ մակերեսին հաստ շերտով լոլիկի սոուս կամ տոմատ քսել, հետո հավասարաչափ տեղավորել մանր կտրատած երշիկը, թթուն և օղակաձև կտրատած սոխը, քերած պանիր և համեմունքներ ցանել, զարդարել սալյամիի մի քանի շերտիկներով: Պիցցան նորից դնել ջեռոցը:

Կոկտեյլներ

armeco-87 — Sat, 08 Dec 2012 10:49:32 GMT

ԱԼԿԱՀՈԼԱՅԻՆ ԿՈԿՏԵՅԼ "ԺԱՆԳՈՏ ՄԵԽ"

Բաղադրությունը
1 բաժնի համար
60 մլ շոտլանդական վիսկի, 40 մլ լիկյոր, ծակծկած սառույց:

Պատրաստման եղանակը
Սառույցով բաժակի մեջ լցնել լիկյորը, ապա՝ վիսկին: Զարդարել կիտրոնի կամ լայմայի շերտով:

Աղանդերներ

ADMIN-S — Sat, 08 Dec 2012 10:42:11 GMT

ԿՈՆՖԵՏՆԵՐ "ԿԱՐՏՈՖԻԼ"

Բաղադրությունը
1 բաժակ տաք կաթ, 4 թեյի գդալ կակաո, 1 բաժակ շաքարավազ, 300 գ վանիլային չորահաց, 200 գ կարագ:

Պատրաստման եղանակը
Շաքարավազը խառնել կակաոյի հետ, լցնել տաք կաթը և եփել, մինչև շաքարավազը լուծվի: Չորահացը առանձին անցկացնել մսաղացով: Այն ավելացնել կաթնային զանգվածի վրա և լավ խառնել: Խմորը բաժանել գնդիկների, ամեն մեկը ընկղմել մանրացված ընկույզի և շաքարի փոշու խառնուրդի մեջ, հետո դնել սառը տեղ:

ԿՈՆՖԵՏՆԵՐ "ՌԱՖԱԵԼՈ"

Բաղադրությունը
200 գ անյուղ կաթնաշոռ, 200 գ կոկոսի քերուկ, 150գ շաքարավազ, նուշ:

Պատրաստման եղանակը
Կաթնաշոռը խառնել շաքարավազի հետ, ավելացնել կոկոսի քերուկը: Լավ խառնել և գդալի օգնությամբ ընկույզի մեծության գնդիկներ պատրաստել: Գնդիկի մեջտեղում մաքրած նուշ դնել, հետո գնդիկները գլորել կոկոսի քերուկի վրայով: 1 ժամ դնել սառնարան:

Աղցաններ

armeco-87 — Sat, 08 Dec 2012 10:35:20 GMT

ԱՂՑԱՆ ԿԱՂԱՄԱՐՈՎ

Բաղադրությունը
Կաղամար (ձուկ)՝ մոտ 1կգ, 1 գլուխ սոխ (փոքր), 1 հատ ձու, 3-4 ճաշի գդալ մայոնեզ, աղ՝ ըստ ճաշակի, ձիթապտուղ՝ զարդարելու համար:

Պատրաստման եղանակը
Ձկները լվալ, հեռացնել փորոտիքը և քորդան:
Դանակով մաքրել կաշին, լվալ, ձկները երկարությամբ կիսել, հետո բարակ կտրատել (5 մմ լայնությամբ) և եփել աղ ցանված ջրում՝ 3-4 րոպե:
Ձկները հանել (դրանք պետք է մի փոքր "կլորացվեն"), թողնել, որ ջուրը քամվի և դնել ափսեի վրա: Եփված ձուն և սոխը մանր կտրատել և ավելացնել ձկներին: Աղցանը համեմել մայոնեզով, զարդարել ձիթապտուղներով և մատուցել:

Սուրճի տեսակներն ու պատրաստման եղանակները

armeco-87 — Mon, 03 Sep 2012 10:30:15 GMT

ՍՈՒՐՃԻ ՏԵՍԱԿՆԵՐԸ

1. Coffea Arabica արաբիկան սուրճի ամենահայտնի տեսակն է, ունի շատ ենթատեսակներ (տիպիկա և բուռբոն, միկո, մակո և գառնիկա)
2. Coffea Canephora սովորաբար հայտնի է Ռոբուստա անվանումով, նշանակում է պինդ և ամուր: Այս սուրճը ավելի թույլ բույր ունի քան արաբիկան և շատ ամուր է:
3. Coffea Liberica
4. Coffea Dewevrei

Սուրճ՝ արաբական ձևով
Սրճեփի մեջ ( 100սմ3) դնել մի կտոր շաքար, 3/4-ի չափով սառը ջուր լցնել և դնել կրակին: Հենց որ պարունակությունը եռա, սրճեփը վերցնել և 5-7գ մանր աղացած սուրճ լցնել: Գդալով խառնելով՝ դնել կրակին և նորից եռացնել: Հենց որ եռա՝ վերցնել կրակից և տաք-տաք մատուցել: Ցանկության դեպքում շաքար ավելացնել:

Սուրճ՝ փարիզյան ձևով
Թարմ պատրաստված տաք սուրճի բաժակի մեջ ավելացնել 1 ճաշի գդալ կակաոյի օշարակ և մակերեսին լցնել 1 թեյի գդալ սերուցք:

Սուրճ՝ վարշավյան ձևով
Սրճեփի մեջ լցնել սուրճը, եռման ջուր ավելացնել (1,5 գդալ սուրճին՝ 100գ ) և եռացնել: Կրակից վերցնել, սառեցնել, 1:1 հարաբերությամբ կաթ կամ սերուցք և շաքար ավելացնել: Նորից եռացնել, լցնել բաժակների մեջ, վրան կաթնային փրփուր դնել:

Սուրճ՝ վիեննական ձևով
Բաժակների մեջ լցված սև սուրճի վրա զգուշորեն ավելացնել մի գդալ շաքարի փոշու և վանիլինի հետ հարած սերուցք (100գ սերուցքին՝ 2-3 ճաշի գդալ շաքարի փոշի և վանիլինի մի քանի բյուրեղ), վրան մանրացված շոկոլադ ցանել:

Սուրճ՝ իռլանդական ձևով
Բաժակի մեջ 2-3 կտոր շաքար դնել, լցնել տաք թունդ սև սուրճ: Վրան մի փոքր սերուցք կամ թթվասեր դնել:

Սուրճ՝ թուրքական ձևով
Այս տարբերակը կոչվում է նաև "սուրճ՝ արևելյան ձևով": Փոքրիկ կոնաձև սրճեփի մեջ (100 սմ3 տարողությամբ) լցնել 5-10 գ մանր աղացած բնական սուրճ, լցնել սառը ջուր և եռացնել: Մատուցելիս առանձին, բարակ ապակե բաժակներով ջուր է մատուցվում: Սուրճը խմում են ոչ մեծ կումերով, վրայից՝ ջուրը: Պարտադիր չէ շաքար մատուցել:

Սուրճ՝ "նոր-օռլեանյան" ձևով
Սրճեփի կամ փոքրիկ կաթսայի մեջ հավասար չափերով խառնել շատ թունդ սուրճ, կաթ և սերուցք: Խառնուրդը դնել կրակին և տաքացնել համարյա մինչև եռման ջերմաստիճան, ապա լցնել բաժակների մեջ և մատուցել:

Սուրճ՝ բրազիլական ձևով
Շոկոլադը (125գ) մանրացնել և լուծել տաք սուրճի մեջ (1/2 բաժակ): Խառնուրդին, անընդհատ խառնելով, ավելացնել 3 բաժակ տաք կաթ: Շաքարը՝ ըստ ճաշակի: Ըմպելիքը լցնել փոքրիկ բաժակների մեջ, յուրաքանչյուրը զարդարել 1 թեյի գդալ հարած սերուցքով:

Սուրճ "Հոլիվուդ"
Առանձին պատրաստել շատ տաք սուրճ, կաթը եռացնել: Կաթսայի մեջ լցնել կակաոն, շաքարը, կաթի մի մասը և լավ խառնել, ապա ավելացնել մնացած կաթը և մի պտղունց աղ: Դնել կրակին և 10 րոպե եռացնել: Կրակից վերցնել, անընդհատ հարել՝ մինչև յուղային, փրփրուն զանգվածի ստացումը, ապա, շարունակելով խառնել, աստիճանաբար ավելացնել սուրճը: Տաք ըմպելիքը լցնել բաժակների մեջ և զարդարել հարած սերուցքով: Սերուցքի վրա բոված նուշ ցանել: Կակաոն և շաքարի փոշին վերցնել մեկական ճաշի գդալ, կաթը և թունդ սև սուրճը՝ մեկական գավաթ:

Սուրճ՝ ռումինական ձևով
Սուրճը, շաքարը և կակաոն խառնել սրճեփի մեջ և սառը ջուր լցնել: Կրակից վերցնել անմիջապես մինչև եռալը և լցնել բաժակների մեջ: Ըստ ճաշակի ավելացնել շաքար, վանիլին և սերուցք: Շաքարը, վանիլինը և սերուցքը մատուցվում է առանձին: Մանր աղացած սուրճ՝ 6 թեյի գդալ, շաքարի փոշի՝ 4 թեյի գդալ, կակաո՝ 2 թեյի գդալ, սառը ջուր՝ 4 բաժակ, շաքար, վանիլին:

Սառույցով սուրճ
Պատրաստել շատ թունդ սուրճ, ավելացնել շաքար, թողնել սառչի և լցնել սառույց պատրաստելու համար նախատեսված ձևամանների մեջ: Երբ սուրճը սառցակալի, այն բաժանել կտորների և վրան լցնել սառը ջուր: Կարելի է օգտագործել նաև գազով ջուր:

Պաղպաղակով սուրճ
Կես բաժակ թունդ սուրճը խառնել կես բաժակ սառը կաթի հետ, ավելացնել 1 ճաշի գդալ շաքարավազ: Այնուհետև վրան դնել 2 ճաշի գդալ պաղպաղակ:

Բուլղարական սառը սուրճ
1 սուրճի բաժակ կեֆիրը լավ խառնել նույն չափսի բաժակով թունդ սուրճի, 5 կտոր շաքարի և 1 ճաշի գդալ սերուցքի հետ: Մինչև մատուցելը այն որոշ ժամանակ դնել սառնարանում:

Խորհուրդներ
Որակյալ և համեղ սուրճ պատրաստելու համար պետք է պահպանել մի քանի պարզ կանոններ: Առաջին կանոնը կայանում է հետևյալում` սրճեփը պետք է լավ լվացված լինի, քանի որ սուրճի յուղային մասը հեշտությամբ հավաքվում է սրճեփի պատերին, որն էլ խանգարում է համեղ սուրճ պատրաստելուն: Եվ հաջորդը` սրճեփը չպետք է օգտագործել այլ նպատակների համար:
Սուրճ եփելու ջուրը պետք է լինի հնարավորինս փափուկ որակի: Խերհուրդ է տրվում սուրճը բովել և աղալ սուրճ եփելուց առաջ: Սուրճի թարմ հոտն ու բույը պահպանելու համար պահեք այն թիթեղյա կամ ապակյա տարաների մեջ` դնելով հեռու ամեն տեսակ բուրավետ համեմունքներից: Սուրճի համը ավելի լավը դարձնելու համար կարելի է ավելացնել մի պտղունց աղ կամ կակաոյի փոշի: Սուրճը մատուցում են եռման կամ շատ սառը վիճակում, բայց ոչ տաք: